अविश्वास ठराव पारीत झाल्याने अखेर सरपंच झाले पायउतार

किनवट (ऍड. विलास सूर्यवंशी ) : येथून जवळच असलेल्या घोटी येथील सरपंच यांचे वरील अविश्वास ठराव पारीत झाल्याने अखेर त्यांना पायउतार व्हावे लागले.
               तालुक्यातील घोटी ग्रामपंचायत  सार्वत्रिक निवडणूक 2016 मध्ये बालाजी पावडे यांच्या पॅनलला बहुमत मिळाले व त्यांनी सत्ता स्थापन केली होती. वच्छला संभा सातपुते यांची सरपंच पदी निवड झाली होती.  काही तांत्रिक अडचणीमुळे त्यांना पायउतार व्हावे लागले होते. त्यामुळे शकुंतला उल्हास राठोड ह्या सरपंचपदी विराजमान झाल्या होत्या. तदनंतर त्यांच्या विरोधात रितसर दाखल केलेला अविश्वास प्रस्ताव आज 6 विरुद्ध 3 मताच्या फरकाने पारित झाला असल्याने ते सरपंच पदावरून पायउतार झाल्या आहेत.
            मौजे घोटी ग्रामपंचायतीत एकूण 9 सदस्य असून दि.22-9-2019 रोजी शकुंतला उल्हास राठोड ह्या सरपंच पदावर विराजमान झाल्या.दरम्यान त्यांच्या कारभाराला वैतागून एकूण 9 सदस्या पैकी 6 सदस्यांनी दि.1-5-2020 रोजी सरपंच राठोड यांच्या विरोधात तहसीलदार किनवट यांच्याकडे रितसर अविश्वास प्रस्ताव दाखल केला होता. प्रस्तावाच्या अनुषंगाने तहसीलदार उत्तम कागणे यांनी घोटी येथील ग्राम पंचायत कार्यालयात विशेष सभा बोलाविली होती. या विशेष सभेत ठरावाच्या बाजूने 6 तर सरपंच शकुंतला उल्हास राठोड यांच्या बाजूने केवळ 3 मते पडली .  त्यामुळे अविश्वास ठराव पारित होऊन राठोड  सरपंच पदावरून पायउतार झाल्या आहेत.
                  या सभेला निवडणूक निर्णय अधिकारी म्हणून तहसीलदार उत्तम कागणे यांनी काम पाहिले. यावेळी मंडळ अधिकारी पी.व्ही. बूरकूले, तलाठी दाऊद खान, ग्राम विकास अधिकारी संदीप आंभोरे हे उपस्थित होते, तर पोलिस उपनिरीक्षक कांबळे व पोहेकॉ बोंडलेवाड यांनी चोख बंदोबस्त ठेवला होता.
                  बालाजी पावडे यांच्या राजकीय अनुभवाचा व विकासात्मक दृष्टीकोनाचा  गावाला फायदा होणार असल्यामुळे गावचा विकास पुनश्च वृद्धीगंत होईल अशा घोटीवासियांच्या आशा पल्लवित झाल्या आहेत.