मुंबई दि, २१ (विशेष प्रतिनिधी उदय नरे ) : काँग्रेस आणि शिवसेना यूबीटी यांच्या नेतृत्वाखालील विरोधी पक्ष आता 'रिन्यू डिसइन्व्हेस्टमेंट' वादावरून सरकारला घेरण्याचा प्रयत्न करत असून सुमारे ३ हजार रोजगार निर्माण होण्याची अपेक्षा असलेली रिन्यू पॉवर लिमिटेडची १८ हजार कोटी रुपयांची गुंतवणूक गुजरातमध्ये हलवण्यात आली असा दावा विरोधकांकडून केला जात आहे. विरोधकांच्या अशा वक्तव्यामुळे महाराष्ट्राची प्रतिमा मालिन होत असल्याचे उप मुख्यमंत्री देवेंद्र फडणवीस यांनी पत्रकारांशी बोलताना सांगितले. मात्र, हा दावा "दिशाभूल करणारा आणि तथ्यात्मकदृष्ट्या चुकीचा " असल्याचे सांगून रीन्यू कंपनीने हे दावे स्पष्टपणे फेटाळले आहेत. तसेच १५ हजार कोटी रुपयांच्या गुंतवणुकीसह ५५० मेगावॅटची स्थापित क्षमता आणि निर्माणाधीन व अतिरिक्त २ हजार मेगावॅटसह सध्या सुरू असलेल्या प्रकल्पांवर प्रकाश टाकताना महाराष्ट्राप्रती आपले प्रेम असल्याचा पुनरुच्चार कंपनीने दिलेल्या निवेदनात केला आहे.
राज्याचे उपमुख्यमंत्री देवेंद्र फडणवीस यांनी विरोधी पक्षांच्या दाव्यांवर जोरदार टीका केली असून कोणतेही प्रकल्प महाराष्ट्राबाहेर हस्तांतरित करण्यात आलेले नाहीत, असे स्पष्ट केले आहे. रिन्यू कंपनीने आपण महाराष्ट्र बाहेर जात नसल्याचे स्पष्ट केल्यानंतर देवेंद्र फडणवीस यांनी विरोधी पक्षाला चांगलेच धारेवर धरले असून विरोधी पक्ष सातत्याने महाराष्ट्राची बदनामी करत आहेत, असा आरोप फडणवीस यांनी केला.
कंपनीचे स्पष्टीकरण असूनही, सध्याच्या प्रशासनावर 'निष्काळजीपणा' आणि गुजरातमध्ये लक्षणीय गुंतवणूक गमावल्याचा आरोप करत विरोधक दिशाभूल करणारे वृत्त पसरवत आहेत. हा एनडीए सरकारविरुद्धच्या द्वेषपूर्ण मोहिमेचा भाग असल्याचे म्हटले आहे. या कथनाच्या राजकीय व्यवहार्यतेमुळे आंधळे झालेले आणि फडणवीसांना लक्ष्य करणारे विरोधक या दाव्यांचा राज्याच्या आर्थिक विकासावर आणि व्यावसायिक वातावरणावर होणारा नकारात्मक परिणाम विचारात घेण्यात अयशस्वी ठरले आहेत. असे कथन केवळ दिशाभूल करणारेच नाही तर महाराष्ट्राच्या प्रतिष्ठेसाठी आणि संभाव्य गुंतवणूकदारांसाठीच्या त्याच्या आकर्षणासाठीही हानिकारक आहे असे महाराष्ट्रातील तज्ज्ञांचे म्हणणे आहे. तसेच राजकीय फायद्यासाठी विरोधकांनी राज्याचे हित धोक्यात घालू नये, असे अनेक राजकीय निरीक्षकांचे मत आहे. सध्या फडणवीस यांना बळीचा बकरा बनविण्याचा विरोधकांचा मानस असून विरोधकांची कृती हि संशयास्पद असल्याचे म्हटले जात आहे. गेल्या लोकसभा निवडणुकीत आणि आता विधानसभा निवडणणुकीच्या तोंडावर राज्य सरकारला बदनाम करण्याच्या आणि देवेंद्र फडणवीसांना लक्ष्य करण्याच्या त्यांच्या दृष्टिकोनातून विरोधकांनी सातत्याने तोफ डागली आहे. मग तो कोणताही मुद्दा असो, विरोधी पक्ष सर्व दोष देवेंद्र फडणवीस यांच्यावर देताना दिसून येत आहे. मात्र सत्ताधारी सरकार विरोधकांकडे दुर्लक्ष्य करून महाराष्ट्राचा औद्योगिक पाया मजबूत करण्यासाठी सक्रियपणे काम करत आहे. अलीकडेच, राज्य सरकारने नवी मुंबईत आर. आर. पी. इलेक्ट्रॉनिक्स लिमिटेडने १२.,०३५ कोटी रुपयांच्या गुंतवणुकीसह स्थापन केलेल्या राज्याच्या पहिल्या सेमीकंडक्टर उत्पादन ओएसएटी (आउटसोर्स्ड सेमीकंडक्टर असेंब्ली अँड टेस्ट) प्रकल्पाचे उद्घाटन केले. आयात केलेल्या सेमीकंडक्टर चिप्सवरील भारताचे अवलंबित्व कमी करणे आणि सुमारे ४०० रोजगार निर्माण करणे हे या उपक्रमाचे उद्दिष्ट आहे.
No comments:
Post a Comment