चित्र :भगवान पेंटर
काळीज घट्ट कर
हिंमत सोडू नकोस
अजून थोडी वाट पहा
जातील हे बी दिवस
हे तर काहीच नाही,
खूप सोसावं लागेल
आपलं मरण
आपल्याच डोळ्याने
पहावे लागेल
लढायचंय आपल्याला
रडू आवर , पूस डोळे
अजून थोडं चालावं लागेल
हळुहळू ते हुक्कापानी बंद करतील
जमली आहे फौज त्यांची सीमेवर
ठाऊकच आहे मला
ते नक्कीच आपल्याला घेरतील आपल्याच माणसांना
आपल्याविरुद्ध चिथावतील
तेल सेंदूर पाजून
पुन्हा मला गढीत गाडतील
आता सखे सावध हो
पांढरीशुभ्र साडी घाल
मांगीर होण्याआधी माझा
चल चिल्यापिल्यांसह
बोधीवृक्षाखाली जाऊ
हल्लेखोर येण्याआधीच
तथागताची वंदना गाऊ
-मारोती कसाब
No comments:
Post a Comment