नांदेड : जिल्ह्यातील प्राथमिक व माध्यमिक शाळांमध्ये शिकविणाऱ्या आपल्या अध्यापन कार्यातून विद्यार्थ्यांचा सर्वांगीण विकास घडविणाऱ्या शिक्षकांस नांदेड जिल्हा परिषदेकडून जिल्हा शिक्षक पुरस्कार देऊन गौरविण्यात येते. सन 2022, 2023 व 2024 या शैक्षणिक वर्षात उत्कृष्ट कामगिरी बजावणाऱ्या एकूण 100 शिक्षकांना शुक्रवार दिनांक 4 ऑक्टोबर, 2024 रोजी येथील कुसुम सभागृहात सकाळी 10 वाजता संपन्न होणाऱ्या कार्यक्रमात महाराष्ट्र राज्याचे माजी मुख्यमंत्री तथा राज्यसभा सदस्य अशोकराव चव्हाण यांच्या हस्ते गौरविण्यात येणार असून कार्यक्रमाच्या अध्यक्षस्थानी पालकमंत्री गिरीश महाजन हे उपस्थित राहणार आहेत.
या कार्यक्रमास प्रमुख अतिथी म्हणून खासदार डॉ. अजित गोपछडे, खासदार नागेश पाटील आष्टीकर, खासदार शिवाजी काळगे, आमदार सतीश चव्हाण, आमदार विक्रम काळे, आमदार बालाजी कल्याणकर, आमदार भीमराव केराम, आमदार माधवराव पाटील जवळगावकर, आमदार डॉ.तुषार राठोड, आमदार श्यामसुंदर शिंदे, आमदार मोहनराव हंबर्डे, आमदार राजेश पवार, नांदेड परिक्षेत्राचे विशेष पोलीस महानिरीक्षक शहाजी उमाप, जिल्हाधिकारी अभिजीत राऊत, मुख्य कार्यकारी अधिकारी तथा प्रशासक मीनल करणवाल, पोलीस अधीक्षक अविनाश कुमार, महानगरपालिका आयुक्त डॉ. महेशकुमार डोईफोडे आदी मान्यवरांची उपस्थिती लाभणार आहे.
या ठिकाणी महावाचन उपक्रमांतर्गत जिल्हा ग्रंथ प्रदर्शन व विज्ञान प्रदर्शनाचे आयोजन करण्यात आले आहे.
या सोहळ्यास शिक्षण प्रेमींनी उपस्थित राहण्याचे आवाहन प्राथमिकच्या शिक्षणाधिकारी डॉ.सविता बिरगे आणि माध्यमिकचे शिक्षणाधिकारी माधव सलगर यांनी केले आहे.
जिल्हा परिषद शाळेत कार्यरत असलेल्या उपक्रमशील व गुणवंत शिक्षकांना त्यांच्या कार्याबद्दल योग्य वेळी शाब्बासकी मिळावी व ते प्रेरित होऊन नव्या उमेदीने विद्यार्थी विकास साधावा या हेतूने तीन वर्षांपासून प्रलंबित असलेला हा पुरस्कार वितरण सोहळा आयोजित करण्याचा निर्णय घेण्यात आला आहे.
-मीनल करनवाल,
मुख्य कार्यकारी अधिकारी तथा प्रशासक, जिल्हा परिषद नांदेड.
जिल्हा शिक्षक पुरस्कार 2022 , 2023 व 2024 साठी किनवट तालूक्यातून माध्यमिक शिक्षक सुनील बाबाराव सिडाम , विठोबा पंडित खैरनार व गणेश विलास शिराळे तर प्राथमिक शिक्षक सुरेश यादवराव पाटील , रमेश बाबाराव पवार व किशोर जनार्धन कावळे यांची निवड झाल्याबद्दल शिक्षण विभाग पंचायत समिती किनवटच्या वतीने गट शिक्षणाधिकारी गंगाधर राठोड , पीएम पोषण शक्ती निर्माण योजना अधिक्षक अनिल महामुने यांचे सह सर्व शिक्षण विस्तार अधिकारी , केंद्र प्रमुख , केंद्रिय मुख्याध्यापक, शिक्षक यांनी अभिनंदन केले आहे.
No comments:
Post a Comment