प्रजासत्ताक दिनी शाळांना सुट्टी नाही; २ कोटी विद्यार्थ्यांच्या 'सामूहिक कवायती'ने होणार जागतिक विक्रम! ​शिक्षण विभागाचे नवे परिपत्रक जारी; 'नेशन फर्स्ट' अंतर्गत दिवसभर विविध उपक्रमांचे आयोजन

 

​| मुंबई | विशेष प्रतिनिधी: उदय नरे |

येत्या २६ जानेवारी २०२६ रोजी राज्यातील शाळांमध्ये प्रजासत्ताक दिन केवळ ध्वजारोहणापुरता मर्यादित न राहता एका ऐतिहासिक विक्रमाचा साक्षीदार ठरणार आहे. शिक्षण विभागाने या डिसेंबर महिन्यात निर्गमित केलेल्या नवीन आदेशानुसार, यावर्षी 'नेशन फर्स्ट' (Nation First) या संकल्पनेवर आधारित 'सामूहिक देशभक्तीपर कवायत' (Mass Patriotic Drill) हे कार्यक्रमाचे मुख्य आकर्षण असणार आहे.

​शाळा 'पूर्ण दिवस' भरणार

शासनाच्या ३१ डिसेंबर २०२४ च्या मूळ निर्णयाचा आधार घेत, शिक्षण विभागाने स्पष्ट केले आहे की, २६ जानेवारीला शाळांना सुट्टी नसून तो 'पूर्ण दिवस' साजरा केला जाईल. ध्वजारोहणानंतर विद्यार्थ्यांना घरी न सोडता शाळेत दिवसभर विविध देशभक्तीपर उपक्रम राबवणे अनिवार्य करण्यात आले आहे.

​काय आहे 'सामूहिक कवायत' उपक्रम?

नव्या आदेशानुसार, ध्वजारोहणानंतर लगेचच सुमारे २० मिनिटांची सामूहिक कवायत घेतली जाणार आहे. यासाठी शिक्षण विभागाने १४ मिनिटे ४० सेकंदाचा एक 'मॉडेल व्हिडिओ' (Model Video) तयार केला असून, त्याधर्तीवरच ही कवायत करून घेण्याच्या सूचना आहेत. राज्यातील १ लाख शाळांमधील सुमारे २ कोटी विद्यार्थी एकाच वेळी यात सहभागी होऊन 'जागतिक विक्रम' (World Record) करण्याचा शासनाचा मानस आहे. शिस्त, शारीरिक तंदुरुस्ती आणि राष्ट्रप्रेम वाढवणे हे यामागील प्रमुख उद्दिष्ट आहे.

​विशेष म्हणजे, कवायत पूर्ण झाल्यानंतर त्याचा व्हिडिओ शासनाच्या अधिकृत पोर्टलवर अपलोड करणे शाळांसाठी बंधनकारक करण्यात आले आहे.

​संविधान उद्देशिकेचे वाचन आणि ८ उपक्रम

शासकीय परिपत्रकानुसार (संकीर्ण-२०२४/प्र.क्र.३६४/एस.डी.-४), ध्वजारोहणावेळी संविधानाच्या उद्देशिकेचे (Preamble) वाचन करणे बंधनकारक आहे. यानंतर प्रभात फेरी, वक्तृत्व स्पर्धा, देशभक्तीपर समूहगान, निबंध व चित्रकला स्पर्धा, नाट्य-नृत्य आणि क्रीडा स्पर्धा असे ८ प्रकारचे उपक्रम दिवसभर राबवावे लागणार आहेत.

​या सोहळ्यात विद्यार्थी, शिक्षक, पालक आणि गावातील प्रतिष्ठित नागरिकांचा सहभाग असावा, असे आवाहन शिक्षण विभागाने केले आहे. हे आदेश राज्यातील सर्व माध्यमांच्या आणि सर्व व्यवस्थापनाच्या शाळांना लागू असतील.

​थोडक्यात: २६ जानेवारी २०२६ चे स्वरूप

१. ध्वजारोहण व संविधान उद्देशिका वाचन.

२. सामूहिक कवायत (२० मिनिटे) - जागतिक विक्रमाचा प्रयत्न.

३. प्रभात फेरी.

४. दिवसभर विविध सांस्कृतिक व क्रीडा स्पर्धा.

५. कवायतीचा व्हिडिओ पोर्टलवर अपलोड करणे.

 विद्यार्थ्यांमध्ये देशभक्ती वाढवण्यासाठी सुरू केलेल्या या उपक्रमाचे हंसराज मोरारजी पब्लिक स्कूल या शाळेचे क्रीडा शिक्षक विजय अवसरमोल सरांनी स्वागत केले आहे.